Venezuelë – Vijojnë operacionet e kërkim-shpëtimit pas tërmetit shkatërrues që goditi vendin këtë javë, ndërsa autoritetet raportojnë se më shumë se 68 mijë persona rezultojnë ende të zhdukur.

Dy tërmete me magnitudë 7.2 dhe 7.5 goditën Venezuelën të mërkurën, duke shkaktuar shkatërrime të mëdha. Sipas bilancit paraprak, 1,430 persona kanë humbur jetën, ndërsa 3,238 të tjerë janë plagosur.

Në operacionet e kërkimit janë angazhuar rreth 30 mijë specialistë venezuelianë, të mbështetur nga ekipe ndërkombëtare. Autoritetet bëjnë të ditur se 24 vende kanë ofruar ndihmë, duke dërguar qindra tonë materiale emergjence, ekipe me qen kërkimi dhe mijëra efektivë të specializuar.

Ndërkohë, banorë të zonave të prekura vijojnë të kërkojnë të afërmit e tyre nën rrënoja, ndërsa ekipet e shpëtimit po punojnë pa ndërprerje, edhe pse kanë kaluar 72 orët e para, periudhë që konsiderohet vendimtare për gjetjen e të mbijetuarve.

Bashkimi Evropian ka njoftuar një ndihmë emergjente prej 5 milionë eurosh për komunitetet e prekura, ndërsa vlerësimet paraprake të Kombeve të Bashkuara e çojnë dëmin ekonomik të shkaktuar nga tërmetet në rreth 6.7 miliardë dollarë.