Kryeministri Edi Rama ka reaguar lidhur me debatet e ditëve të fundit për ndërhyrjet në Banjat Termale të Bënjës, ku është pretenduar se zona është dëmtuar dhe betonizuar.

Në një postim në rrjetet sociale, Rama publikoi pamje nga ndërhyrjet e kryera rreth 10 vite më parë, duke theksuar se në zonë nuk janë hequr apo dëmtuar mure antike, por është realizuar një sistemim i mëparshëm i infrastrukturës së llixhave.

Sipas tij, muret e dikurshme të dëmtuara janë rindërtuar dhe veshur me gurë gjatë procesit të rikualifikimit, në kuadër të projektit për zhvillimin turistik të zonës.

Kryeministri i cilësoi akuzat e ngritura në media dhe nga kritika politike si të pabazuara, duke i lidhur ato me “debat politik dhe narrativa të deformuara”.

Ndërhyrjet në Bënjë janë pjesë e projektit “Bënja – Destinacion Ndërkombëtar Turistik”, i financuar nga Fondi Shqiptar i Zhvillimit, që synon përmirësimin e infrastrukturës dhe rritjen e fluksit turistik në një nga zonat natyrore më të vizituara pranë Përmetit.