Tensionet në Lindjen e Mesme janë përshkallëzuar ndjeshëm pasi Irani ka ndërmarrë sulme ndaj Kuvajtit dhe Bahreinit, në përgjigje të goditjeve të mëparshme amerikane ndaj objektivave iraniane.

Sipas mediave ndërkombëtare, Korpusi i Gardës Revolucionare Islamike (IRGC) ka konfirmuar se ka lëshuar raketa balistike dhe dronë drejt bazës ajrore amerikane “Ali Al Salem” në Kuvajt, si dhe drejt Flotës së Pestë Detare të SHBA-së në Port Salman, Bahrein.

Autoritetet në Bahrein e kanë dënuar ashpër sulmin, duke e cilësuar shkelje të sovranitetit dhe një hap që rrezikon përpjekjet për uljen e tensioneve në rajon. Edhe Kuvajti ka reaguar duke e quajtur sulmin një agresion të përsëritur dhe shkelje flagrante të sovranitetit të tij.

Ngjarja vjen pas goditjeve të raportuara amerikane ndaj disa objektivave në Iran, përfshirë Sirikun, Bandar-e Lengeh dhe ishullin Qeshm. Sipas Komandës Qendrore të SHBA-së (CENTCOM), forcat amerikane kanë kryer sulme ndaj 10 objektivave ushtarake iraniane në zona pranë Ngushticës së Hormuzit, si përgjigje ndaj një sulmi të mëparshëm me dron ndaj një tankeri nafte.

Situata mbetet e tensionuar, ndërsa rajoni i Gjirit Persik ndodhet në një fazë të rrezikshme përshkallëzimi.