Presidenti i Serbisë, Aleksandar Vuçiç, ka njoftuar se shërbimi i detyrueshëm ushtarak do të nisë në mars të vitit 2027, duke theksuar se bëhet fjalë për një shërbim me kohëzgjatje “shumë të shkurtër”.

Deklarata u bë gjatë një vizite në aeroportin ushtarak “Millenko Pavloviq” në Batajnicë, pranë Beogradit, ku Vuçiç inspektoi armatimin dhe pajisjet e ushtrisë.

“Para kësaj do të fillojnë procedurat burokratike, ndërsa në mars do të fillojmë shërbimin e detyrueshëm ushtarak shumë të shkurtër. Kjo do t’i forcojë më tej kapacitetet tona mbrojtëse”, u shpreh presidenti serb.

Megjithëse nuk specifikoi kohëzgjatjen e shërbimit, Vuçiç kishte deklaruar më herët se ai pritet të zgjasë 75 ditë. Rikthimi i tij do të hyjë në fuqi vetëm pasi të miratohet nga Kuvendi i Serbisë.

Qeveria serbe ka paralajmëruar prej vitesh rikthimin e shërbimit të detyrueshëm ushtarak. Nisma u konkretizua në janar 2024, ndërsa në shtator të po atij viti Vuçiç nënshkroi dokumentet për nisjen e procedurave.

Shërbimi i detyrueshëm ushtarak në Serbi u hoq më 1 janar 2011 dhe që prej asaj kohe ka qenë vullnetar. Ndërkohë, edhe Kroacia vendosi rikthimin e këtij sistemi në tetor 2025.