Kryetari i Partisë Demokratike, Sali Berisha, ka reaguar pas deklaratave të kryeministrit Edi Rama në podkastin “Flasim”, ku ky i fundit mbrojti librin “The Albanian Files” dhe kritikoi sulmet ndaj tij.

Në një video-mesazh, Berisha akuzoi Ramën se po përpiqet të justifikojë, sipas tij, abuzime me pasuritë publike dhe private duke u fshehur pas emrave të arkitektëve dhe studiove të njohura ndërkombëtare.

Sipas kreut të opozitës, botimi i librit dhe prezantimi i projekteve nuk përfaqësojnë sukses qeverisës, por, siç u shpreh ai, e paraqesin Ramën si "një sulltan të një sulltanati", që e trajton vendin si pronë personale.

Berisha ngriti gjithashtu pikëpyetje mbi 523 projektet e përfshira në botim, duke kërkuar transparencë për burimet e financimit. Ai bëri thirrje që institucione ndërkombëtare si Eurojust, Europol dhe Interpol të hetojnë pagesat e kryera, ndërsa përmendi edhe pretendime për konflikte interesi dhe përfitime familjare në zonën e Gjipesë.

Në përfundim, Berisha e cilësoi reagimin e qytetarëve ndaj projektit dhe librit si "plotësisht të merituar dhe dinjitoz".