Porti i Durrësit ka mirëpritur këtë të diel anijen turistike “Nautica”, pjesë e flotës së kompanisë Oceania Cruises, e cila është ankoruar në kalatën nr. 5 me 665 pasagjerë në bord.

Sipas autoriteteve portuale, shumica e turistëve vijnë nga Shtetet e Bashkuara, ndërsa në bord ndodhen gjithashtu vizitorë nga Mbretëria e Bashkuar, Kanadaja, Australia dhe vende të tjera.

Anija, me gjatësi 181 metra dhe me flamur të Ishujve Marshall, rikthehet në Portin e Durrësit edhe këtë sezon si pjesë e itinerarit të saj mesdhetar.

Gjatë qëndrimit në Shqipëri, turistët do të vizitojnë qytetin e Durrësit, si edhe destinacione të tjera me vlera historike, kulturore dhe turistike.

Me mbërritjen e njëpasnjëshme të anijeve turistike gjatë javëve të fundit, Porti i Durrësit ka hyrë zyrtarisht në sezonin e kroçerave, duke vijuar të mirëpresë vizitorë nga vende të ndryshme të botës.