Policia e Shtetit ndërhyri mëngjesin e kësaj të diele për të larguar protestuesit që kishin kaluar natën përpara godinës së Kryeministrisë, ku prej rreth një jave zhvillohen tubime kundër qeverisë me kërkesën për dorëheqjen e kryeministrit Edi Rama.

Sipas informacioneve paraprake, në operacion morën pjesë rreth 100 efektivë policie, të cilët larguan protestuesit nga zona dhe më pas pastruan hapësirën përpara godinës.

Gjatë ndërhyrjes u hoqën edhe këpucët e vendosura në shkallët e Kryeministrisë, një instalacion simbolik që protestuesit e kishin përdorur për të përfaqësuar emigrimin e të rinjve dhe mungesën e perspektivës në vend. Veprimi shkaktoi reagime nga disa qytetarë të pranishëm, ndërsa u regjistruan edhe tensione verbale mes protestuesve dhe forcave të policisë.

Më tej, efektivët sekuestruan disa stola metalikë të vendosur në ambientet e protestës, të cilët sipas organizatorëve përdoreshin si pjesë e strukturës së improvizuar të tubimit.

Organizatorët kanë bërë të ditur se protesta do të vijojë edhe gjatë ditës së sotme, duke e cilësuar atë si tubimin e 29-të radhazi. Ata kanë përsëritur se kërkesa kryesore mbetet dorëheqja e kryeministrit Edi Rama dhe kanë ftuar qytetarët t’u bashkohen protestës.