SHBA godet sërish Iranin, Teherani sulmon Bahreinin dhe Kuvajtin – rrezikohet marrëveshja për armëpushim

Ushtria amerikane ndërmori një valë të dytë sulmesh ajrore ndaj objektivave ushtarake në Iran me urdhër të presidentit Donald Trump, ndërsa Teherani reagoi duke lëshuar raketa dhe dronë drejt Bahreinit dhe Kuvajtit. Zhvillimet e fundit kanë rritur ndjeshëm tensionet në rajon dhe po vënë në rrezik marrëveshjen e përkohshme të armëpushimit mes dy vendeve.

Sulmi ndaj Kuvajtit, i kryer në orët e para të së dielës, ishte i pari që nga nënshkrimi i marrëveshjes për ndalimin e luftimeve. Ai ndodhi vetëm një ditë pasi një organizëm shumëkombësh detar, i mbikëqyrur nga Marina Amerikane, njoftoi zgjerimin e korridorit të lundrimit pranë brigjeve të Omanit në Ngushticën e Hormuzit, për të lejuar kalimin e anijeve në të dy drejtimet. Ky vendim shihet si një pikë e re përplasjeje me Iranin.

Komanda Qendrore e SHBA-së (CENTCOM) bëri të ditur se sulmet amerikane goditën infrastrukturën iraniane të mbikëqyrjes ushtarake, sistemet e komunikimit, pozicionet e mbrojtjes ajrore, depot e dronëve dhe kapacitetet për vendosjen e minave detare. Sipas autoriteteve amerikane, operacioni u ndërmor si përgjigje ndaj sulmit ndaj një anijeje cisternë në det në orët e para të së shtunës.

Anija e sulmuar, cisterna Kiku, me flamur panamez, transportonte naftë bruto për kompaninë shtetërore energjetike të Katarit, një nga ndërmjetësit kryesorë në negociatat mes SHBA-së dhe Iranit.

Presidenti Donald Trump reagoi përmes rrjeteve sociale, duke deklaruar se SHBA kishte goditur depot iraniane të raketave dhe dronëve, si edhe stacionet bregdetare të radarëve, pasi sipas tij Irani kishte shkelur sërish marrëveshjen e armëpushimit.

"Nëse kjo vazhdon, do të vijë një moment kur SHBA nuk do të ketë më arsye të tregojë përmbajtje dhe do të detyrohet ta përfundojë ushtarakisht këtë çështje. Nëse ndodh kjo, Republika Islamike e Iranit nuk do të ekzistojë më", shkroi Trump në platformën Truth Social.

Përshkallëzimi i fundit vjen vetëm pak ditë pas një incidenti të ngjashëm, kur një dron iranian goditi një anije tregtare pranë brigjeve të Omanit dhe SHBA u përgjigj me sulme ajrore ndaj objektivave iraniane.

Sipas faqeve të monitorimit të trafikut detar, cisterna Kiku ishte nisur nga një fushë nafte në Katar dhe kishte destinacion një port në Emiratet e Bashkuara Arabe, në Gjirin e Omanit, duke përdorur korridorin alternativ pranë brigjeve të Omanit dhe jo rrugën detare të kontrolluar nga Irani.

Ushtria amerikane deklaroi se Irani kishte mundësinë të respektonte marrëveshjen e armëpushimit, por zgjodhi ta shkelte atë duke sulmuar cisternën Kiku.

Ndërkohë, televizioni shtetëror iranian raportoi për shpërthime në një zonë në veri të Ngushticës së Hormuzit.

Pas sulmeve amerikane, ushtria e Kuvajtit njoftoi se sistemet e mbrojtjes ajrore arritën të interceptonin raketat dhe dronët iranianë. Autoritetet nuk dhanë menjëherë informacion mbi dëmet e mundshme. Kujtojmë se Kuvajti strehon një nga bazat më të mëdha të Ushtrisë Amerikane në rajon.

U.S. Navy and Air Force fighter jets conducted strikes tonight on 10 Iranian military targets at multiple locations in and near the Strait of Hormuz for Iran's drone attack on M/T Kiku. pic.twitter.com/Z0TLZRqmF6

— U.S. Central Command (@CENTCOM) June 28, 2026