Një ngjarje e jashtëzakonshme ka ndodhur mes tragjedisë që goditi Venezuelën, ku një grua solli në jetë foshnjën e saj nën rrënojat e ndërtesave të shembura pas një serie të fuqishme tërmetesh.

Fatkeqësia natyrore ka shkaktuar qindra viktima dhe ka lënë mijëra persona pa strehë, pasi dy tërmete të fuqishme goditën vendin mbrëmjen e së mërkurës.

Sipas të dhënave zyrtare, deri më tani janë konfirmuar 589 viktima, 2.980 persona të plagosur dhe 57.000 të zhdukur, ndërsa Shërbimi Gjeologjik i Shteteve të Bashkuara (USGS) vlerëson se numri i të vdekurve mund të arrijë deri në 10.000.

Më shumë se 250 ndërtesa u shembën pas dy tërmeteve me magnitudë 7.2 dhe 7.5, të cilët ndodhën vetëm 39 sekonda larg njëri-tjetrit, duke lënë mijëra njerëz të bllokuar nën rrënoja.

Pamjet e publikuara tregojnë gruan të shtrirë mbi një dërrasë, e rrethuar nga banorë në errësirë, ndërsa një grua tjetër e ndihmon të sjellë në jetë foshnjën. Pas lindjes, e porsalindura dëgjohet duke qarë, ndërsa gruaja që asistoi në lindje e mbështjell me kujdes me batanije. Persona të tjerë mbulojnë edhe nënën për ta mbrojtur.

Presidentja e Venezuelës, Delcy Rodríguez, shpalli gjendjen e jashtëzakonshme dhe urdhëroi mobilizimin e operacioneve të kërkim-shpëtimit. Megjithatë, autoritetet dhe strukturat shëndetësore u mbingarkuan shumë shpejt nga përmasat e katastrofës, duke bërë që banorët dhe të mbijetuarit të bashkonin forcat për të nxjerrë nga rrënojat personat e bllokuar dhe për t’u dhënë ndihmën e parë të plagosurve.

Video të publikuara nga banorët dhe ekipet e shpëtimit tregojnë njerëz që kërkojnë ndihmë nga poshtë rrënojave, ndërsa të rritur, fëmijë dhe madje edhe qen shpëtohen me duar nga mbetjet e ndërtesave të shembura.