TIRANË – Dita e diel do të karakterizohet nga kushte atmosferike të qëndrueshme në të gjithë territorin e vendit. Moti parashikohet i nxehtë dhe kryesisht i kthjellët deri në orët e mesditës.

Gjatë mesditës dhe pasdites pritet shtim i përkohshëm i vranësirave të pakta deri mesatare, të përqendruara kryesisht në zonat kodrinore dhe malore. Në mbrëmje, moti do të jetë sërish i kthjellët në të gjithë vendin.

Sipas parashikimit, në orët më të nxehta të ditës mund të ketë reshje të izoluara shiu në formë pikash në majat e maleve të juglindjes.

Era do të fryjë kryesisht nga verilindja dhe veriperëndimi me shpejtësi mesatare rreth 7 m/s. Përgjatë vijës bregdetare dhe në lugina, herë pas here, shpejtësia e saj mund të arrijë deri në 14 m/s.

Ndërkohë, valëzimi në detet Adriatik dhe Jon parashikohet të jetë i forcës 1 deri në 3 ballë.