Algjeria dhe Austria siguruan njëkohësisht kualifikimin në fazën e 1/32-ve të Kupës së Botës 2026, pasi barazuan 3-3 në ndeshjen e fundit të grupit, në një sfidë që dhuroi emocione deri në sekondat e fundit. Dy golat e shënuar në minutat shtesë vulosën një fund spektakolar, me të dyja skuadrat që arritën objektivin e tyre.

Me këtë rezultat, të dyja ekipet e mbyllën fazën e grupeve me nga katër pikë. Austria e përfundoi grupin në vendin e dytë falë golavarazhit më të mirë dhe në fazën e 1/32-ve do të përballet me Spanjën. Ndërkohë, Algjeria u kualifikua si një nga skuadrat e vendeve të treta dhe do të sfidojë Zvicrën.

Austria kaloi e para në avantazh në minutën e 28-të. David Alaba dha një pasim perfekt për Marko Arnautoviç, i cili doli i vetëm përballë portierit dhe shënoi për rezultatin 1-0.

Algjeria reagoi dhe në minutën e 40-të krijoi rastin më të mirë deri në atë moment. Sejbi provoi me një goditje të fuqishme, por topi u ndal nga shtylla, duke mohuar golin e barazimit.

Megjithatë, afrikanët arritën të barazonin në minutën e 45-të. Topi mbeti në lojë pranë flamurit të këndit, Mahrez e rikuperoi, pasoi për Belgalin, i cili kaloi disa mbrojtës dhe shënoi bukur për rezultatin 1-1.

Në pjesën e dytë Austria rimori avantazhin. Në minutën e 55-të, Laimer harkoi në zonë, Marcel Sabitzer goditi saktë nga brenda zonës dhe realizoi për 2-1.

Por përgjigjja e Algjerisë erdhi vetëm pesë minuta më vonë. Houssem Aouar depërtoi bukur nga krahu i majtë dhe pasoi për Riyad Mahrez, i cili me një goditje të saktë barazoi shifrat në 2-2.

Minutat e fundit ishin dramatike. Në minutën e tretë shtesë (90+3′), Mahrez realizoi golin e dytë personal, duke përmbysur rezultatin në 3-2 dhe duke afruar Algjerinë me fitoren.

Megjithatë, Austria nuk u dorëzua. Në minutën e gjashtë shtesë (90+6′), Sasa Kalajdžić shënoi golin e barazimit 3-3, duke vulosur një rezultat që i dërgoi të dyja skuadrat në fazën me eliminim direkt.

Çelësi i ndeshjes

Riyad Mahrez ishte lojtari që bëri diferencën për Algjerinë. Ai pati rol vendimtar në të tre golat e skuadrës së tij, duke dhënë asist në golin e parë dhe duke realizuar dy herë vetë.

MVP

Riyad Mahrez dhe Marko Arnautoviç ishin lojtarët më të spikatur të ndeshjes, por çmimi i më të mirit i takoi Mahrezit falë dy golave të shënuar dhe kontributit të tij vendimtar edhe në golin e Belgalit.

Gjyqtari

Arbitri uzbek Ilgiz Tantashev zhvilloi një paraqitje të mirë, duke administruar një ndeshje pa episode të vështira apo vendime të diskutueshme.

Golashënuesit

45′ Belgali

60′ Mahrez

90+3′ Mahrez

Për Austrinë:

28′ Arnautoviç

55′ Sabitzer

90+6′ Kalajdžić