Mijëra qytetarë marshuan mbrëmjen e së shtunës në rrugët e Tiranës, në vijim të protestës së 28-të, duke kërkuar dorëheqjen e kryeministrit Edi Rama.

Pas më shumë se dy orësh e gjysmë tubim në bulevardin "Dëshmorët e Kombit", protestuesit nisën marshimin në akset kryesore të kryeqytetit, duke mbajtur pankarta dhe flamuj.

Gjatë marshimit u dëgjuan thirrje si: "Rama, jep dorëheqjen", "Pa rini nuk ka Shqipëri", "Poshtë patronazhistët", si dhe slogane të tjera kundër qeverisë. Në mesin e brohoritjeve pati edhe thirrjen: "Rama n’burg, Berisha n’burg".

Marshimi u zhvillua pa incidente, ndërsa pjesëmarrësit vijuan lëvizjen në grup përgjatë rrugëve kryesore të Tiranës, nën masa sigurie nga Policia e Shtetit.