Kreu i Partisë Demokratike, Sali Berisha, ka deklaruar se do të udhëtojë në Shtetet e Bashkuara të Amerikës edhe përpara se të marrë postin e kryeministrit, nëse opozita fiton zgjedhjet.

Gjatë një komunikimi me qytetarët në rrjetet sociale, Berisha u shpreh se nuk e kushtëzon vizitën në SHBA me ardhjen në pushtet, duke theksuar se mund të udhëtojë edhe në cilësinë e opozitarit për pjesëmarrje në aktivitete apo konferenca ndërkombëtare.

“Do të shkoj edhe më parë, natyrisht në momentin e përshtatshëm. Unë jam në opozitë dhe mund të shkoj për të marrë pjesë në një konferencë,” u shpreh ai.

Në të njëjtin komunikim, Berisha rikonfirmoi mbështetjen për protestat e opozitës dhe akuzoi kryeministrin Edi Rama për qëndrime ndaj ish-luftëtarëve të UÇK-së dhe vendimmarrje politike, të cilat ai i cilësoi të padrejta.

Ai gjithashtu iu referua rasteve të shpalljes “non grata” dhe akuzave ndaj qeverisë, duke vijuar linjën e tij kritike ndaj mazhorancës.