Një ngjarje e rëndë ka tronditur Romën, ku tre anëtarë të një familjeje me origjinë nga Bangladeshi u vranë brutalisht me hanxhar brenda banesës së tyre, ndërsa djali 20-vjeçar mbeti i plagosur.

Krimi ndodhi në rrugën Via Montiglio, pranë zonës Via Pineta Sacchetti, në veri të kryeqytetit italian. Viktimat janë identifikuar si Kamal Uddin, 39 vjeç, bashkëshortja e tij Arzu, 38 vjeçe, dhe vajza e tyre 8-vjeçare, Alicia.

I vetmi i mbijetuar i sulmit është djali i madh i familjes, Onion, 20 vjeç, i cili u plagos gjatë përleshjes me autorin e dyshuar dhe ndodhet nën kujdesin e mjekëve.

Sipas mediave italiane, hetimet po drejtohen nga Skuadra Mobile e Policisë së Romës. Autoritetet janë në kërkim të një shtetasi nga Bangladeshi, i cili dyshohet të ketë qenë mik i familjes. Sipas hetuesve, ai është futur në banesë pasi është pritur nga viktimat dhe më pas ka kryer sulmin.

Dyshohet se i riu 20-vjeçar ka tentuar të ndalojë autorin, duke u përleshur me të, para se të arrinte të largohej dhe të kërkonte ndihmë.

Policia vijon hetimet për të zbardhur motivet e krimit dhe për të lokalizuar e arrestuar autorin e dyshuar.