Policia e Tiranës ka proceduar penalisht 15 persona në lidhje me protestën e zhvilluar në kryeqytet, duke i akuzuar për organizim dhe pjesëmarrje në grumbullime e manifestime të paligjshme, prishje të rendit dhe qetësisë publike, si dhe pengim të qarkullimit të mjeteve të transportit.

Sipas njoftimit zyrtar, gjatë veprimeve procedurale janë sekuestruar në cilësinë e provës materiale një automjet dhe dy telefona celularë.

Policia bën të ditur se tubimi ishte njoftuar të zhvillohej nga ora 19:00 deri në orën 22:00 në Sheshin “Skënderbej” dhe në bulevardin “Dëshmorët e Kombit”. Megjithatë, sipas autoriteteve, protestuesit vijuan lëvizjen edhe në disa akse të tjera të kryeqytetit, përfshirë Rrugën e Elbasanit, zonën e 9-Katësheve, ish-Bllokun dhe segmente të Unazës, duke bllokuar qarkullimin e automjeteve përtej itinerarit dhe orarit të njoftuar.

Materialet procedurale i janë referuar Prokurorisë për veprime të mëtejshme, ndërsa hetimet për rastin vijojnë.