Ukraina ka ndërmarrë një sulm gjatë natës dhe në orët e para të mëngjesit të së shtunës ndaj një objekti industrial ushtarak në qytetin rus të Volgogradit, sipas deklaratave të presidentit ukrainas Volodymyr Zelensky.

Zelensky tha në një postim se objektivi i sulmit ishte kompleksi “Titan-Barrikady”, i cili sipas tij përdoret për prodhimin e sistemeve të artilerisë dhe komponentëve për lëshues raketash. Ai shtoi se në goditje janë përdorur raketa të tipit “Flamingo” dhe se në zonë janë shkaktuar zjarre.

Autoritetet rajonale ruse konfirmuan dëmtime në një objekt industrial, por nuk dhanë detaje mbi natyrën e prodhimit. Guvernatori i Volgogradit raportoi se të paktën 10 persona janë plagosur dhe se disa vatra zjarri janë shuar gjatë ndërhyrjes së shërbimeve emergjente.

Sipas mediave ndërkombëtare, fabrika e goditur është e lidhur me prodhimin e komponentëve për sistemet raketore “Iskander”, “Yars” dhe “Topol-M”, të afta të mbajnë koka bërthamore. Po ashtu, ajo dyshohet se ka lidhje me programin e raketës së re ruse me rreze të mesme veprimi “Oreshnik”.

Objekti konsiderohet me rëndësi strategjike për industrinë ushtarake ruse, ndërsa Ukraina ka intensifikuar në muajt e fundit sulmet ndaj infrastrukturës ushtarake dhe energjetike brenda territorit rus, kryesisht përmes dronëve dhe raketave me rreze të gjatë veprimi.

Kievi ka deklaruar se këto sulme synojnë të dobësojnë kapacitetin ushtarak të Rusisë dhe të ndërpresin furnizimet logjistike për trupat e saj në front.