Në kuadër të përgatitjeve për sezonin turistik 2026, Inspektorati Shtetëror Shëndetësor (ISHSH), dega rajonale Tiranë, ka shtuar kontrollet në subjektet që operojnë në sektorin e hoteleri-turizmit, pishinave dhe beach bareve.

Sipas autoriteteve, inspektimet po zhvillohen në zbatim të urdhrave për monitorimin e të gjitha pishinave, me qëllim verifikimin e kushteve higjieno-sanitare dhe garantimin e sigurisë shëndetësore për pushuesit gjatë sezonit veror.

Ministria e Shëndetësisë dhe Mbrojtjes Sociale bën të ditur se këto kontrolle synojnë të sigurojnë respektimin e kërkesave ligjore nga subjektet turistike, duke rritur standardet e shërbimit dhe sigurisë për qytetarët dhe turistët.

Sipas ISHSH-së, gjatë inspektimeve në terren janë konstatuar raste të mosrespektimit të legjislacionit në fuqi, për të cilat janë vendosur masat administrative përkatëse ndaj subjekteve përgjegjëse.

Institucioni thekson se prioritet mbetet garantimi i kushteve të sigurta për pushuesit, duke reduktuar rreziqet që lidhen me higjienën dhe shëndetin publik.

Për këtë qëllim është ngritur një grup i posaçëm inspektimi, i cili do të kryejë kontrolle të përditshme dhe do të trajtojë ankesat dhe denoncimet e qytetarëve përgjatë gjithë sezonit turistik.