Tentoi të vriste, duke e goditur me automjet nënën e bashkëjetueses, duke i shkaktuar dëmtime trupore, dhe u largua nga vendi i ngjarjes, pas reagimit të Policisë, kapet dhe vihet në pranga 28-vjeçari. Sekuestrohet automjeti i përdorur në ngjarje

Lezhë – Në gjendje kritike është një grua në Lezhë pasi burri që bashkëjetonte me vajzën e saj, e përplasi me makinë duke e plagosur rëndë, pas një sherri verbal mes tyre.

Ngjarja nisi si një rrugëtim normal i 28 vjeçarit Cuf Behi, teksa ai shkoi me makinë për të marrë bashkëjetuesen e tij nga shtëpia e prindërve dhe për tu kthyer së bashku në banesën e tyre.

Por ngjarja precipitoi ashpër kur palët u grindën mes tyre.

"Nga veprimet e para hetimore rezulton se, rreth orës 02:05, në lagjen “Skënderbeg”, në Lezhë, 28-vjeçari ka shkuar me automjet për të marrë bashkëjetuesen e tij", tha policia lokale.

Është e paqartë ora e vonë që ka shkuar i riu te shtëpia e prindërve të bashkëjetueses së tij për ta marrë atë dhe për të shkuar në Tiranë ku ai ka vendbanimin.

Në këtë moment kanë dalë familjarët e saj dhe, për motive që lidhen me marrëdhëniet familjare, ai dyshohet se ka përplasur me automjet nënën e bashkëjetueses, shtetasen K. H., 43 vjeçe, duke i shkaktuar dëmtime trupore, dhe më pas është larguar nga vendi i ngjarjes.

Pas veprimeve të Policisë, në kuadër të operacionit policor të koduar “Reagimi”, u lokalizua, u kap dhe u vu në pranga shtetasi Cuf Behi, 28 vjeç, banues në Tiranë.

Ai akuzohet për veprën penale "Vrasja për shkak të marrëdhënieve familjare", mbetur në tentativë.

E dëmtuara u transportua në Spitalin e Traumës, në Tiranë, ku vijon të jetë nën kujdesin e mjekëve.

Në cilësinë e provës materiale u sekuestrua automjeti i përdorur në ngjarje.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.