Policia e Kamzës ka zbardhur dhe dokumentuar ngjarjen e ndodhur mbrëmjen e së premtes në zonën e Babrrusë, ku u qëllua me armë zjarri në drejtim të një servisi celularësh. Si rezultat i një operacioni të shpejtë policor, është arrestuar autori i dyshuar, një 18-vjeçar.

Sipas njoftimit zyrtar, i arrestuari është shtetasi R. M., i cili dyshohet se, pas një konflikti për motive të dobëta me pronarin e servisit, shtetasin Xh. I., ka qëlluar dy herë me armë zjarri automatike në drejtim të biznesit.

Nga të shtënat janë shkaktuar vetëm dëme materiale në fasadën e jashtme dhe në ambientet e brendshme të servisit, ndërsa nuk raportohet për persona të lënduar.

Në kuadër të operacionit policor të koduar "Zbulimi", shërbimet e Komisariatit të Policisë Nr. 5 lokalizuan dhe arrestuan 18-vjeçarin rreth tre kilometra larg vendit të ngjarjes.

Gjatë kontrolleve në zonë, policia gjeti dhe sekuestroi armën automatike të dyshuar të përdorur në ngjarje, si dhe municion luftarak.

Materialet procedurale i janë referuar Prokurorisë për veprime të mëtejshme hetimore.

Kamëz Zbardhet dhe dokumentohet ngjarja e ndodhur mbrëmjen e djeshme në Babrru. Qëlloi me armë zjarri automatik në drejtim të një servisi celularësh, pas një konflikti për motive të dobëta me pronarin e tij, kapet dhe vihet në pranga 18-vjeçari. Gjendet dhe sekuestrohet arma e zjarrit e përdorur në ngjarje, së bashku me municion luftarak. Shërbimet e Komisariatit të Policisë Nr. 5, pas marrjes së njoftimit se në Babrru një shtetas kishte qëlluar me armë zjarri në drejtim të një servisi celularësh, organizuan menjëherë një operacion policor për identifikimin, lokalizimin dhe kapjen e autorit. Nga veprimet hetimore u dokumentua se autori i dyshuar, shtetasi R. M., 18 vjeç, pas një konflikti për motive të dobëta me pronarin e servisit, shtetasin Xh. I., ka qëlluar dy herë me armë zjarri automatike në drejtim të biznesit, duke shkaktuar vetëm dëme materiale në fasadën e jashtme dhe në ambientet e brendshme. Në kuadër të operacionit policor “Zbulimi” të organizuar dhe të zhvilluar në një kohë shumë të shkurtër, shërbimet e Policisë lokalizuan, rreth 3 kilometra larg vendit të ngjarjes, kapën dhe vunë në pranga shtetasin R. M., 18 vjeç. Gjatë kontrollit të zonës u gjet dhe u sekuestrua arma e zjarrit automatike, e përdorur në ngjarje, si dhe municion luftarak. Materialet procedurale iu referuan Prokurorisë, për veprime të mëtejshme.