Kryeministri i Maqedonisë së Veriut, Hristijan Mickoski, ka paralajmëruar një riformatim të gjerë të kabinetit qeveritar, duke theksuar se ndryshimet diktohen nga prioritetet e reja të vendit dhe jo domosdoshmërisht nga performanca e ministrave.

Sipas Mickoskit, pas dy vitesh në qeverisje, sfidat dhe nevojat e qytetarëve kanë ndryshuar, çka e bën të domosdoshëm një riorganizim të ekzekutivit.

"Rindërtimi i qeverisë nuk bëhet vetëm për shkak të rezultateve. Ndonjëherë ndryshimet janë të nevojshme sepse prioritetet e shtetit dhe të shoqërisë evoluojnë," deklaroi ai.

Kryeministri bëri të ditur se vendimet përfundimtare mbi përbërjen e re të qeverisë do të merren pas mbledhjes së Komitetit Ekzekutiv të VMRO-DPMNE-së, e cila është planifikuar të zhvillohet në javën e dytë të korrikut.

Në muajt e fundit janë përfolur ndryshime në disa dikastere qeveritare dhe emra të rinj për poste ministrore, ndërsa pritet edhe një riorganizim i strukturës së kabinetit.

Mickoski mbrojti punën e qeverisë së tij, duke deklaruar se ekzekutivi ka arritur të stabilizojë institucionet dhe të përmirësojë situatën krahasuar me atë që, sipas tij, trashëgoi nga qeveritë e mëparshme. Ai hodhi poshtë akuzat e opozitës se shumica e premtimeve elektorale nuk janë përmbushur.

Megjithatë, kreu i qeverisë pranoi se ka pasur ankesa për mungesën e komunikimit të disa ministrave dhe drejtuesve të institucioneve me qytetarët. Ai paralajmëroi se nuk do të tolerojë sjellje që cenojnë standardet e qeverisjes dhe u bëri thirrje zyrtarëve që nuk ndihen më në gjendje të përmbushin detyrën të japin dorëheqjen.

Mandati i plotë i qeverisë së Mickoskit përfundon në pranverën e vitit 2028, ndërsa sipas legjislacionit të vendit, para zgjedhjeve parlamentare pritet të formohet një qeveri teknike.