Protestat kundër qeverisë në Tiranë kanë hyrë në ditën e 28-të, ndërsa një grup i vogël protestuesish ka kaluar natën përpara godinës së Kryeministrisë, pas tubimit të zhvilluar mbrëmjen e së premtes në Bulevardin "Dëshmorët e Kombit".

Sipas organizatorëve, protesta do të vijojë deri në plotësimin e kërkesave të paraqitura ndaj qeverisë. Gjatë tubimit të fundit u përsëritën thirrjet për dorëheqjen e Kryeministrit dhe kabinetit qeveritar, krijimin e një qeverie teknike tranzitore me mandat 12-mujor, si dhe ndërmarrjen e ndryshimeve kushtetuese dhe ligjore përmes referendumit popullor.

Protestuesit kërkojnë gjithashtu ndryshime në Kodin Zgjedhor, reformimin e ligjit për financimin e partive politike, kufizimin e mandateve të Kryeministrit në jo më shumë se dy gjatë gjithë jetës, si dhe shfuqizimin e disa ligjeve dhe vendimeve që, sipas tyre, lidhen me zonat e mbrojtura, trashëgiminë kulturore, "Paktin e Maleve" dhe statusin e investimeve strategjike.

Pas fjalimeve, pjesëmarrësit marshuan në rrugët e kryeqytetit, duke ndaluar edhe pranë selisë së Partisë Demokratike, ku shprehën kritika edhe ndaj opozitës.

Ndërkohë, organizatorët kanë deklaruar se protestat do të vijojnë në mënyrë paqësore deri në realizimin e kërkesave të tyre.