Qyteti i Vlorës është vendosur nën masa të shtuara sigurie mëngjesin e së shtunës, në prag të protestës së paralajmëruar nga përfaqësues të shoqërisë civile kundër projektit për vendosjen e TEC-eve lundruese në zonën e Triportit.

Në terren janë angazhuar mbi 200 efektivë të Policisë së Shtetit, përfshirë forcat e rendit, Njësinë Speciale "Shqiponja", Njësinë Delta dhe Forcat e Ndërhyrjes së Shpejtë, të ardhura nga disa qarqe të vendit. Prania e shtuar e uniformave blu synon garantimin e rendit dhe sigurisë gjatë zhvillimit të tubimit.

Sipas organizatorëve, protesta është thirrur për të shprehur kundërshtimin ndaj vendosjes së TEC-eve lundruese në Triport, duke kërkuar njëkohësisht pezullimin e projektit dhe më shumë transparencë nga institucionet përgjegjëse për vendimmarrjen.

Pjesëmarrësit kanë deklaruar gjithashtu se kundërshtojnë rrethimin e zonës, duke e konsideruar projektin me ndikim të mundshëm në mjedis dhe interesin publik.

Deri në këto momente, situata në zonën e Triportit paraqitet e qetë, ndërsa autoritetet mbeten në gatishmëri për të monitoruar mbarëvajtjen e protestës dhe për të garantuar rendin publik gjatë gjithë zhvillimit të saj.