Belgjika ka dhuruar një paraqitje bindëse në ndeshjen e fundit të fazës së grupeve të Kupës së Botës, duke mposhtur Zelandën e Re me rezultatin 5-1 dhe duke siguruar vendin e parë në Grupin G.

Skuadra belge e nisi takimin me ritëm të lartë, duke ushtruar presion të vazhdueshëm ndaj kundërshtarit. Leandro Trossard ishte protagonist që në minutat e para, ndërsa një penallti e akorduar për Belgjikën u anulua pas ndërhyrjes së sistemit VAR.

Avantazhi erdhi në minutën e 28-të, kur Trossard përfitoi nga një situatë e paqartë në zonë dhe dërgoi topin në rrjetë. Në pjesën e dytë, sulmuesi belg realizoi dopietën personale me një goditje volej spektakolare.

Belgjika nuk u ndal me kaq. Kevin De Bruyne shënoi golin e tretë në minutën e 66-të, ndërsa Zelanda e Re gjeti rrugën e rrjetës vetëm në minutën e 84-t me Elijah Just. Reagimi belg ishte i menjëhershëm, pasi Romelu Lukaku realizoi me kokë vetëm dy minuta më vonë, ndërsa Alexis Saelemaekers vulosi fitoren 5-1 në kohën shtesë.

Me këtë sukses, Belgjika e mbyll fazën e grupeve në krye të Grupit G, falë golavarazhit më të mirë se Egjipti, dhe avancon në fazën me eliminim direkt. Nga ana tjetër, Zelanda e Re i jep fund aventurës në Kupën e Botës me vetëm një pikë të grumbulluar.

Rezultati: Zelanda e Re 1-5 Belgjika

Golat: 84′ Elijah Just / 28′, 50′ Leandro Trossard, 66′ Kevin De Bruyne, 86′ Romelu Lukaku, 90+4′ Alexis Saelemaekers.