Presidenti i Shteteve të Bashkuara, Donald Trump, ka prezantuar një pasaportë koleksionuese me edicion të kufizuar që mban portretin e tij, në kuadër të festimeve për 250-vjetorin e Deklaratës së Pavarësisë së SHBA-së.

Sipas postimeve të tij në platformën Truth Social, dokumenti përshkruhet si një “Pasaportë Patriotike”, me mesazhin “Mirë se vini, por silluni mirë”. Dizajni paraqet Trump të ulur pas tavolinës presidenciale, me tekstin e Deklaratës së Pavarësisë në sfond dhe firmën e tij në fund.

Në faqen e dytë të pasaportës koleksionuese shfaqet një ilustrim i nënshkrimit të Deklaratës së Pavarësisë në vitin 1776, i shoqëruar me shënimin “United States of America 250”.

Shtëpia e Bardhë ka shpërndarë imazhe të dokumentit në rrjetet sociale, duke e prezantuar si një iniciativë simbolike për përvjetorin historik. Sipas raportimeve, kjo është hera e parë që një president në detyrë shfaqet në një dokument të tillë.

Nisma ka ngjallur gjithashtu debat, me kritikë që e kanë cilësuar si një formë të kultit të personalitetit, ndërsa administrata e ka paraqitur si pjesë të festimeve zyrtare për 250-vjetorin e SHBA-së.