BRUKSEL – Komisionerja Evropiane për Zgjerimin, Marta Kos, ka deklaruar se procesi i zgjerimit të Bashkimit Evropian ka hyrë në një fazë të re dinamike, duke theksuar se brenda mandatit të saj, i cili përfundon në vitin 2029, BE-ja synon të mirëpresë anëtarë të rinj.

Në një deklaratë për mediat, Kos u shpreh se Shqipëria dhe Mali i Zi janë vendet që kanë bërë përparimin më të madh në rrugën drejt integrimit evropian, duke i cilësuar vitet e ardhshme si vendimtare për procesin e anëtarësimit.

"Mund të them se Mali i Zi do të jetë anëtari i ardhshëm gjatë mandatit tim. Nëse Islanda vendos t’i rikthehet procesit të anëtarësimit dhe qytetarët e mbështesin këtë në referendumin e muajit gusht, do të jem gjithashtu shumë e lumtur. Shqipëria tashmë ka nisur mbylljen e kapitujve të negociatave. Procesi i zgjerimit po ecën me një ritëm më të shpejtë se në 15 vitet e fundit," deklaroi Komisionerja për Zgjerimin.

Kos theksoi se Shqipëria ka si objektiv anëtarësimin e plotë në Bashkimin Evropian deri në vitin 2030, ndërsa vlerësoi progresin e bërë në procesin e negociatave dhe reformat e ndërmarra në kuadër të integrimit evropian.