SHBA – Tensionet në Lindjen e Mesme janë përshkallëzuar më tej, pasi forcat amerikane kanë ndërmarrë sulme ndaj objektivave iraniane në rajonin e Ngushticës së Hormuzit.

Sipas raportimeve të mediave ndërkombëtare, burime nga Irani kanë njoftuar për shpërthime në qytetin bregdetar të Shiriqit, i vendosur pranë Ngushticës së Hormuzit. Deri më tani, autoritetet iraniane nuk kanë publikuar një reagim zyrtar mbi dëmet apo pasojat e sulmeve.

Më herët, presidenti amerikan Donald Trump deklaroi në një postim në rrjetet sociale se Irani kishte lëshuar të paktën katër dronë ndaj anijeve që po lundronin në Ngushticën e Hormuzit.

Sipas Trump, një prej dronëve goditi kuvertën e një anijeje të madhe mallrash, duke shkaktuar dëme materiale, por pa ndërprerë lundrimin e saj. Ai shtoi se tre dronët e tjerë u rrëzuan përpara se të arrinin objektivat.

Presidenti amerikan e cilësoi incidentin si një "shkelje serioze të marrëveshjes së armëpushimit", megjithëse nuk dha detaje të mëtejshme mbi rrethanat e sulmit apo mbi natyrën e marrëveshjes së përmendur.

Situata në rajon mbetet e tensionuar, ndërsa pritet që zhvillimet e orëve në vijim të qartësojnë shkallën e përshkallëzimit të konfliktit dhe reagimet e palëve të përfshira.