GREQI – Një grup kriminal i dyshuar për trafik droge në ishullin e Mikonos është goditur nga Policia greke, ndërsa hetimet kanë zbuluar edhe komunikime mes anëtarëve të rrjetit që ndodhen tashmë në dosjen hetimore.

Sipas mediave greke, grupi drejtohej nga një shtetas shqiptar 37-vjeçar me inicialet E. A., i cili dyshohet se përdorte një kompani transporti turistësh me furgonë si mbulesë për aktivitetin e paligjshëm.

Gjatë operacionit policor në Mikonos, Pire dhe Perama, autoritetet sekuestruan sasi të konsiderueshme lëndësh narkotike, përfshirë kokainë, kanabis, ketaminë dhe substanca të tjera psikoaktive, si dhe materiale të ndryshme që dyshohet se lidheshin me shpërndarjen e tyre.

Biseda të përgjuara mes anëtarëve të grupit

Në përgjimet e publikuara nga mediat greke, anëtarët e grupit diskutojnë për lëvizjet e tyre dhe shpërndarjen e lëndëve narkotike, duke përdorur gjuhë të koduar për të shmangur zbulimin nga autoritetet.

Në një nga bisedat, anëtarët flasin për “mallin” dhe situatën në terren, përfshirë praninë e policisë dhe lëvizjet e klientëve. Në komunikime të tjera përmenden edhe termat e koduar për substancat narkotike dhe mënyrat e shpërndarjes së tyre.

Në një pjesë tjetër të përgjimeve, ata diskutojnë për kërkesat e klientëve, ku përmenden substanca të ndryshme të paligjshme, ndërsa në disa raste përdoret gjuhë e koduar për të përshkruar aktivitetin e tyre.

Autoritetet greke vijojnë hetimet për të identifikuar të gjithë anëtarët e rrjetit dhe për të dokumentuar plotësisht aktivitetin kriminal të grupit.