TIRANË – Dy turiste nga Holanda janë shpëtuar pas një operacioni kërkim-shpëtimi të zhvilluar në zonën e Shpellës së Pëllumbasit, në fshatin Pëllumbas, ku njëra prej tyre mbeti e lënduar pas një rrëzimi.

Sipas Policisë së Shtetit, menjëherë pas marrjes së njoftimit, shërbimet e Komisariatit të Policisë Nr. 1, në bashkëpunim me Policinë Alpine të Forcës Kombëtare të Sigurisë, organizuan operacionin për lokalizimin dhe nxjerrjen e dy turisteve, të cilat kishin mbetur të bllokuara në një terren të vështirë gjatë eksplorimit të zonës.

Pas gjetjes së tyre, efektivët i dhanë ndihmën e parë turistes së dëmtuar, e cila më pas u transportua me ambulancë drejt Spitalit të Traumës për trajtim mjekësor. Turistja tjetër u shoqërua në një zonë të sigurt.

Dy shtetaset holandeze falënderuan policinë dhe ekipet e emergjencës për reagimin e shpejtë dhe profesional gjatë operacionit.

Policia e Shtetit u bën apel qytetarëve dhe turistëve që, për çdo situatë emergjente gjatë vizitave në zona malore apo turistike, të telefonojnë numrin pa pagesë 112.