TIRANË – Ka nisur protesta e 27-të radhazi kundër qeverisë, ku qytetarë janë mbledhur sërish para godinës së Kryeministrisë, duke kërkuar dorëheqjen e kabinetit qeveritar dhe duke artikuluar akuza për korrupsion, mungesë llogaridhënieje dhe krizë të përfaqësimit politik.

Ashtu si në tubimet e mëparshme të ashtuquajturit "Revolucioni Flamingo", protestuesit mbanin pankarta me mesazhe politike dhe qytetare drejtuar qeverisë dhe klasës politike.

Mes sloganëve të shfaqur në protestë ishin:

"35 vite pushtet, 3 emra, 1 fat: Llogaridhënie." "Europa mbështet demokracinë, jo korrupsionin." "Shqipëria nuk është në shitje." "O Ramë, nuk shkohet në Europë si Putini dhe Xi." "Nuk ju mjaftuan 36 vite në kurrizin e shqiptarëve, zotërinj PUSHT-etarë?"

Gjatë protestës, pjesëmarrësit shprehën pakënaqësinë e tyre ndaj institucioneve shtetërore, duke akuzuar qeverinë, Kuvendin dhe klasën politike për mungesë transparence, mosllogaridhënie dhe largim nga shqetësimet e qytetarëve.

Tubimi po zhvillohet para Kryeministrisë nën masa të shtuara sigurie, ndërsa deri më tani nuk raportohen incidente.