Ministri i Ekonomisë, Kulturës dhe Inovacionit, Blendi Gonxhja, ka reaguar lidhur me protestat që po zhvillohen prej disa ditësh në vend, duke përjashtuar çdo mundësi dorëheqjeje të qeverisë dhe duke i cilësuar kërkesat për rrëzim të saj si të pabazuara dhe të rrezikshme për stabilitetin institucional.

Në deklaratën e tij, Gonxhja tha se institucionet kanë reaguar menjëherë ndaj ngjarjeve që kanë nxitur pakënaqësi publike, ndërsa theksoi se kërkesat për dorëheqje masive nuk marrin parasysh përgjegjësitë shtetërore dhe kontratën me qytetarët.

Ai u shpreh se mandati qeveritar nuk mund të ndërpritet pa një alternativë të qartë, duke shtuar se qeveria është e fokusuar në detyrimet e saj dhe në procesin e integrimit europian.

Gonxhja theksoi gjithashtu se Shqipëria ka kaluar sfida të mëdha si tërmeti dhe pandemia, ndërsa sipas tij vendi sot ndodhet në një gjendje më të mirë se më parë, edhe pse pritshmëritë e qytetarëve mbeten të larta.

Në një pjesë të deklaratës së tij, ministri paralajmëroi se protestat mund të shfrytëzohen për “agjenda të tjera”, duke përdorur shprehjen “ujku mjegull do”, për të nënkuptuar sipas tij ekzistencën e përpjekjeve për të përfituar politikisht nga situata e krijuar.

Gonxhja shtoi se qeveria respekton protestën si formë demokratike, por theksoi se përgjigjja ndaj pakënaqësive duhet të jetë proporcionale dhe brenda kornizës institucionale, jo përmes kërkesave për dorëheqje të menjëhershme.

Në përmbyllje, ai ritheksoi se qeveria mbetet e fokusuar në përmbushjen e detyrimeve dhe reformave, duke i konsideruar protestat si pjesë të debatit demokratik, por jo si arsye për ndryshim të menjëhershëm të ekzekutivit.