Autoritetet franceze kanë vendosur masa të jashtëzakonshme për shkak të valës ekstreme të të nxehtit që ka përfshirë vendin. Në Paris është ndaluar përkohësisht konsumimi i alkoolit në vende publike, ndërsa spitalet po përballen me një rritje të ndjeshme të pacientëve të prekur nga temperaturat e larta.

Ndalimi hyn në fuqi nga mesdita e së premtes deri në orët e para të mëngjesit të së shtunës dhe do të zbatohet sërish gjatë fundjavës. Gjithashtu, autoritetet kanë kufizuar edhe shitjen e alkoolit për t’u marrë me vete gjatë orëve të mbrëmjes.

Shefi i Policisë së Parisit, Patrice Faure, deklaroi se spitalet kanë arritur në kufijtë e kapaciteteve të tyre, ndërsa Ministria e Shëndetësisë raportoi se shërbimi i ambulancave ka regjistruar katër herë më shumë raste arresti kardiak se zakonisht gjatë 24 orëve të fundit.

Temperaturat në Paris kanë arritur në 40.9 gradë Celsius, një rekord për muajin qershor. Si pasojë e vapës ekstreme, autoritetet raportojnë dhjetëra viktima nga mbytjet, ndërsa janë shënuar edhe raste tragjike të fëmijëve që humbën jetën pasi u lanë në automjete të ekspozuara ndaj diellit.

Për të përballuar situatën, janë mbyllur disa shkolla, parqet do të qëndrojnë të hapura gjatë natës dhe disa prej atraksioneve më të njohura turistike, përfshirë Kullën Eiffel dhe Muzeun e Luvrit, kanë reduktuar oraret e funksionimit.

Mbi 44 milionë banorë në Francë ndodhen nën nivelin më të lartë të alarmit për vapën, ndërsa meteorologët paralajmërojnë se temperaturat ekstreme pritet të vijojnë edhe në ditët në vijim.