Tiranë – Partia Demokratike do të zhvillojë më 1 korrik, në orën 18:00, mbledhjen konstituive të Këshillit Kombëtar, ku pritet të zgjidhen drejtuesit e rinj të strukturave kryesore të partisë.

Sipas njoftimit zyrtar, në rendin e ditës janë parashikuar zgjedhja e kryetarit të Këshillit Kombëtar dhe Kryesisë së Partisë Demokratike, si dhe diskutimi i çështjeve të tjera organizative.

Në kuadër të riformatimit të strukturave drejtuese, priten zgjedhje edhe për postet kryesore të partisë, të cilat aktualisht mbahen nga Flamur Noka si sekretar i Përgjithshëm, ndërsa Oerd Bylykbashi dhe Luçiano Boçi ushtrojnë funksionet e nënkryetarëve.

Në njoftimin drejtuar anëtarëve të Këshillit Kombëtar, drejtuesit e PD-së i kanë uruar të zgjedhurit për mandatin e tyre në institucionin më të lartë drejtues të partisë, duke i ftuar të marrin pjesë në mbledhjen konstituive.

Rendi i ditës:

Zgjedhja e kryetarit të Këshillit Kombëtar; Zgjedhja e Kryesisë së Partisë Demokratike; Të tjera.