Mykonos, Greqi – Policia greke ka goditur një organizatë kriminale të përfshirë në trafikimin e lëndëve narkotike në ishullin e Mykonos, duke arrestuar pesë persona, mes tyre edhe një 37-vjeçar shqiptar, i dyshuar si drejtuesi i grupit.

Sipas mediave greke, shqiptari kishte kamufluar aktivitetin kriminal përmes një kompanie transporti turistik me furgonë. Automjetet e saj përdoreshin jo vetëm për transportin e turistëve, por edhe për lëvizjen e anëtarëve të organizatës dhe shpërndarjen e lëndëve narkotike, kryesisht në Mykonos dhe zonat me fluks të lartë vizitorësh.

Nga hetimet rezulton se aktiviteti i grupit kishte nisur në mesin e muajit prill, ndërsa fitimet e përfituara nga trafiku i drogës vlerësohen në rreth 700 mijë euro.

Gjatë operacionit, autoritetet ushtruan kontrolle në banesa dhe ambiente të përdorura nga grupi në Mykonos, Pire dhe Perama.

Si rezultat, u sekuestruan rreth 4.5 kilogramë kokainë, sasi kokaine rozë, kanabis, tableta me substanca farmaceutike, ketaminë dhe kërpudha halucinogjene.

Hetimet vijojnë për identifikimin e personave të tjerë të përfshirë dhe zbardhjen e plotë të aktivitetit të organizatës kriminale.