Tiranë – Ka shkuar në 64 numri i studentëve të Akademisë së Sigurisë që kanë përfunduar në spital me simptoma të dyshuara të helmimit ushqimor, pas konsumimit të vakteve të ofruara nga kompania e kateringut SORI-AL.

Burime nga hetimi bëjnë me dije se, përveç 60 kursantëve të raportuar fillimisht, edhe katër studentë të tjerë janë paraqitur në urgjencë me të njëjtat simptoma.

Prokuroria e Tiranës ka zgjeruar hetimet, të cilat tashmë përfshijnë jo vetëm kompaninë që furnizon ushqimin, por edhe Autoritetin Kombëtar të Ushqimit (AKU), për të verifikuar procedurat e kontrollit dhe mbikëqyrjes.

Gjatë ditës pritet të merret në pyetje administratorja e kompanisë SORI-AL, Alma Tafani, e cila po hetohet në gjendje të lirë. Ndërkohë, grupi hetimor është në pritje të rezultateve të analizave laboratorike të mostrave të ushqimit, të cilat pritet të përcaktojnë shkakun e helmimit.

Policia dhe Prokuroria vijojnë hetimet për zbardhjen e plotë të ngjarjes, ndërsa dosja e rastit të fundit pritet të bashkohet me hetimin për incidentin e ngjashëm të ndodhur në fillim të muajit maj.

Në rastin e parë, rreth 52 studentë u helmuan pasi konsumuan ushqimin e ofruar nga e njëjta kompani. Analizat laboratorike konstatuan se makaronat ishin të kontaminuara me bakteret Escherichia coli dhe Staphylococcus, çka çoi në bllokimin e aktivitetit të kompanisë dhe vendosjen e një gjobe prej 1.5 milionë lekësh për shkelje të standardeve higjieno-sanitare.

Megjithatë, disa ditë më vonë, AKU vendosi të zhbllokojë aktivitetin e kompanisë, pasi analizat e mëvonshme të higjienës së ambienteve dhe pajisjeve të punës rezultuan brenda parametrave të lejuar.

Hetimet pritet të sqarojnë nëse helmimi i fundit lidhet me të njëjtat shkaqe dhe nëse janë respektuar standardet e sigurisë ushqimore.