Tregjet ndërkombëtare – Çmimi i naftës ka shënuar rënie të ndjeshme në tregjet globale, duke u kthyer në nivelet më të ulëta të muajve të fundit, pas lehtësimit të tensioneve gjeopolitike dhe normalizimit të lundrimit në Ngushticën e Hormuzit.

Nafta e tipit Brent ka zbritur në rreth 73 dollarë për fuçi, pasi kishte arritur më herët kulmin në rreth 126 dollarë, gjatë periudhës së përshkallëzimit të konfliktit në Lindjen e Mesme. Ky nivel përfaqëson gjithashtu kuotën më të ulët që prej fundit të shkurtit.

Sipas analistëve të tregjeve, përfshirë Chris Beauchamp nga IG, Brent është në rrugën drejt regjistrimit të rënies më të fortë mujore që nga viti 2020. Ai thekson se rënia e çmimit mund të sjellë lehtësim për konsumatorët, por njëkohësisht të ndikojë negativisht në fitimet e kompanive të sektorit të energjisë.

Raportohet se rreth 200 anije kanë kaluar tashmë nëpër Ngushticën e Hormuzit pas marrëveshjeve për uljen e tensioneve mes Shteteve të Bashkuara dhe Iranit, duke ndihmuar në rikthimin gradual të normalitetit në furnizimin global.

Rënia e çmimeve në tregjet ndërkombëtare pritet të reflektohet me vonesë edhe në tregun vendas të karburanteve në Shqipëri, për shkak të kontratave të mëparshme të furnizimit dhe kohës së transportit të ngarkesave.

Sipas referencave të platformës Platts, çmimet e naftës për tregun shqiptar kanë shënuar luhatje ditore, ndërsa efektet në pikat e shitjes me pakicë zakonisht shfaqen me disa ditë ose javë vonesë.

Ekspertët theksojnë se zhvillimet e ardhshme në tregjet ndërkombëtare do të varen nga stabiliteti gjeopolitik dhe balanca mes kërkesës dhe ofertës globale.