Tiranë – Besimtarët bektashinj kanë kremtuar sot Festën e Ashures, një nga ditët më të rëndësishme të kalendarit shpirtëror të këtij komuniteti, që simbolizon sakrificën, reflektimin dhe vlerat e besimit.

Në Kryegjyshatën Botërore Bektashiane u zhvillua një ceremoni përkujtimore në nderim të 72 dëshmorëve të Qerbelasë, ku morën pjesë besimtarë dhe përfaqësues të komunitetit.

Kryegjyshi Botëror i Bektashinjve, Baba Edmond Brahimaj (Baba Mondi), përcolli një mesazh urimi dhe reflektimi, duke theksuar nevojën për paqe dhe solidaritet në botë.

“Le të mbështesim njëri-tjetrin dhe të ruajmë vlerat e familjes dhe besimit. Lutjet tona shkojnë për ata që vuajnë nga luftërat. Sot njerëzimi ka nevojë për më shumë paqe dhe dhembshuri. Zoti i ndriçoftë zemrat me urtësi dhe të forcojë frymën e vëllazërisë mes kombeve. Zoti na bekoftë të gjithëve,” u shpreh ai.

Festa e Ashures lidhet me ngjarjen historike të betejës së Qerbelasë, ku u martirizua Imam Husejni së bashku me ndjekësit e tij, rreth 1400 vite më parë. Ngjarja konsiderohet simbol i sakrificës për drejtësi dhe të vërtetën.

Ceremonia në Kryegjyshatë u zhvillua në një atmosferë përkujtimore dhe shpirtërore, duke theksuar mesazhet e paqes, besimit dhe bashkimit mes njerëzve.