Kryeministri Edi Rama reagoi ndaj kritikave për projektligjin që lidhet me blerjen e tokës nga shtetasit e vendeve të Bashkimit Europian, duke theksuar se dispozitat e tij do të hyjnë në fuqi vetëm pas anëtarësimit të Shqipërisë në BE.

TIRANË – Kryeministri Edi Rama ka reaguar përmes një postimi në rrjetet sociale ndaj kritikave për projektligjin që parashikon mundësinë e blerjes së tokës në Shqipëri nga shtetas të vendeve të Bashkimit Europian.

Në reagimin e tij, Rama ironizoi kundërshtarët e nismës, duke cituar vargjet e At Gjergj Fishtës: "Po nuk ban kurrë hajër Shqipnija, n’se padija dhe krenija do të shkojnë njit si trupi e hija". Ai i cilësoi kritikat si të bazuara në keqinterpretim të përmbajtjes së projektligjit.

Sipas kryeministrit, nisma është pjesë e paketës së projektligjeve që lidhen me procesin e negociatave për anëtarësimin e Shqipërisë në Bashkimin Europian dhe nuk prodhon efekte të menjëhershme. Rama sqaroi se dispozitat e saj do të hyjnë në fuqi shtatë vite pas anëtarësimit të vendit në BE.

Ai theksoi se, pas anëtarësimit, qytetarët e vendeve anëtare të Bashkimit Europian do të kenë të drejtë të blejnë tokë në Shqipëri, njësoj si qytetarët shqiptarë do të mund të blejnë prona në vendet e BE-së.

Në përfundim të reagimit, Rama shkroi se "me hyrjen në BE, Shqipëria do të jetë e madhe sa BE-ja dhe BE-ja do të jetë e vogël sa Shqipëria", duke argumentuar se projektligji bazohet në parimin e reciprocitetit mes vendeve anëtare të unionit.