Një zjarr i përmasave të mëdha ka përfshirë një zonë bujqësore dhe pyjore pranë Orkomenos, duke mobilizuar forca të shumta zjarrfikëse dhe mjete ajrore për vënien e flakëve nën kontroll.

Sipas autoriteteve greke, në operacion janë angazhuar 105 zjarrfikës me 25 automjete, ndërsa nga ajri ndërhyjnë periodikisht 10 avionë zjarrfikës dhe tre helikopterë për të kufizuar përhapjen e zjarrit.

Shërbimi Grek i Zjarrfikësve bëri të ditur se operacioni po monitorohet në kohë reale nga Qendra Kombëtare e Koordinimit për Operacionet dhe Menaxhimin e Krizave (ESKEDIK), e cila përdor dronë të pajisur me kamera optike dhe termike për të ndjekur zhvillimin e situatës.

Ndërkohë, në zonë ka mbërritur edhe një ekip i specializuar për hetimin e rasteve të zjarrvënies nga rajoni i Viotisë, i cili do të verifikojë shkaqet e shpërthimit të flakëve.

Sipas informacioneve paraprake, zjarri ka shpërthyer pak pas orës 15:30 në një zonë jashtë qendrës së banuar. Deri më tani nuk raportohen viktima apo dëme në banesa, ndërsa autoritetet vijojnë përpjekjet për shuarjen e plotë të flakëve.