Protesta kundër Qeverisë dhe Kryeministrit Edi Rama ka vijuar edhe këtë të enjte në Tirana, duke hyrë në ditën e saj të 26-të. Protestuesit marshuan drejt godinës së Kryeministrisë, duke përsëritur thirrjet për dorëheqjen e kreut të qeverisë dhe ndryshimin e sistemit politik.

Paralelisht me zhvillimin e protestës, Policia e Tiranës ka njoftuar procedimin penal të 11 personave, të dyshuar për veprën penale “Pengimi i qarkullimit të mjeteve të transportit”, lidhur me tubimet e zhvilluara në dy ditët e fundit. Sipas policisë, protestuesit kanë bllokuar akse rrugore, duke penguar lëvizjen e automjeteve dhe qytetarëve.

Mes personave të proceduar është edhe Dritan Goxhaj.

Në të njëjtën ditë, në Konferencën e Kryetarëve, shumica parlamentare rrëzoi dy kërkesat e Partisë Demokratike për zhvillimin e një mocioni me debat lidhur me rezolutën e Parlamentit Europian dhe kërkesat e protestuesve.

Përfaqësuesit e mazhorancës argumentuan se nuk e njohin Partinë Demokratike si përfaqësuese të protestuesve, ndërsa opozita akuzoi shumicën se po shmang debatin dhe llogaridhënien për çështjet e ngritura nga qytetarët gjatë protestave.