Janë publikuar të dhënat e deklarimit të pasurisë për vitin 2025 të Kryeministrit të Shqipërisë, Edi Rama, dhe familjes së tij, ku pasqyrohen ndryshime në të ardhurat, llogaritë bankare dhe asetet financiare.

Sipas deklarimit zyrtar, Rama ka raportuar rreth 10.9 milionë lekë të ardhura nga burime të tjera përveç pagës së tij si kryeministër. Në dokumentin e publikuar nuk jepet një specifikim i detajuar mbi origjinën e këtyre të ardhurave, ndërsa paga vjetore e deklaruar si kreu i qeverisë rezulton rreth 3.4 milionë lekë.

Po ashtu, llogaria bankare e kryeministrit është rritur me rreth 349 mijë lekë gjatë vitit të raportuar.

Ndërkohë, bashkëshortja e tij, Linda Rama, ka deklaruar rreth 6.7 milionë lekë të ardhura nga punësimi, aktivitetet e ekspertizës dhe të ardhurat nga qiradhënia. Ajo ka vijuar gjithashtu shlyerjen e detyrimeve bankare, me pagesa vjetore prej rreth 338 mijë lekësh dhe mbi 23 mijë eurosh për dy kredi të ndryshme. Sipas deklarimit, detyrimet e mbetura vijojnë të jenë të konsiderueshme si në lekë ashtu edhe në euro.

Në dokument përfshihet edhe rivlerësimi i një apartamenti me sipërfaqe 118 metra katrorë, i cili tashmë figuron me një vlerë prej rreth 19.2 milionë lekësh.

Deklarimi përfshin edhe të dhënat financiare të djalit të kryeministrit, Gregor Rama. Sipas dokumentit, ai ka raportuar një rritje të kursimeve bankare me rreth 8 200 euro dhe mbi 108 mijë lekë, ndërsa fondet e investimit janë ulur me rreth 16.4 mijë euro. Gjithashtu, ai deklaron mbi 1 milion lekë të ardhura të tjera dhe një reduktim të gjendjes cash.

Të dhënat e publikuara pasqyrojnë lëvizjet financiare, të ardhurat dhe asetet e familjes Rama gjatë vitit 2025, bazuar në deklarimet zyrtare të pasurisë.