Tiranë, 25 qershor 2026 – Drejtori i Përgjithshëm i Policisë së Shtetit, Skënder Hita, ka mbledhur me urgjencë drejtuesit e Akademisë së Sigurisë, pas rastit të dyshuar të helmimit të rreth 60 kursantëve të Kolegjit Profesional të Formimit Policor.

Sipas burimeve, Hita ka qenë i pranishëm në ambientet e Akademisë që në orët e para pas ngjarjes, menjëherë pasi kursantët u transportuan në Repartin Infektiv të QSUT-së për trajtim mjekësor.

Gjatë takimit emergjent, kreu i Policisë së Shtetit ka kërkuar analizë të plotë të situatës dhe zbardhje të menjëhershme të rrethanave që çuan në shfaqjen e simptomave shëndetësore te kursantët.

Ai ka kërkuar gjithashtu identifikimin e çdo përgjegjësie të mundshme dhe marrjen e masave ligjore ndaj personave që mund të rezultojnë të përfshirë, deri në përfundim të hetimeve institucionale.

Ndërkohë, strukturat hetimore dhe shëndetësore po vijojnë punën për përcaktimin e shkakut të incidentit, përmes analizave laboratorike të ushqimeve dhe kontrolleve në ambientet e institucionit.