Kavajë, 25 qershor 2026 – Janë zbardhur detaje të reja nga dëshmia e 76-vjeçarit Muharrem Rrashka, i cili akuzohet për vrasjen e vëllait të tij, Eqerem Rrashka, pas një konflikti të ndodhur në fshatin Agonas të Kavajës.

Gjatë marrjes në pyetje nga policia, i moshuari ka deklaruar se mes tij dhe vëllait ekzistonte prej kohësh një mosmarrëveshje për një rrugë që, sipas tij, kalonte në pronën e tij dhe përdorej nga viktima për të hyrë në tokën bujqësore.

Sipas dëshmisë së tij, konflikti është riaktivizuar kur vëllai ka kaluar sërish me zetor në rrugën e kontestuar, pavarësisht kundërshtimeve të vazhdueshme. Ai pretendon se gjatë debatit situata është përshkallëzuar, duke çuar në përleshje fizike mes tyre.

“Mes nesh kishte konflikte të vjetra për një rrugë që e konsideroja pjesë të pronës sime. I kërkoja vazhdimisht të mos kalonte aty, por ai vazhdonte ta përdorte. Gjatë debatit dhe përleshjes e godita disa herë me thikë. Nuk kisha për qëllim ta përdorja armën, por veprova në gjaknxehtësi e sipër. Më vjen shumë keq për atë që ndodhi dhe jam penduar”, mësohet të ketë deklaruar 76-vjeçari para hetuesve.

Pas ngjarjes së rëndë, strukturat e Policisë së Kavajës kanë shtuar masat e sigurisë në zonë për të parandaluar përshkallëzimin e mëtejshëm të konfliktit mes familjarëve. Një patrullë policie është vendosur në fshatin Agonas për monitorimin e situatës.

Ndërkohë, grupi hetimor, nën drejtimin e Prokurorisë, po vijon veprimet procedurale për zbardhjen e plotë të rrethanave të ngjarjes dhe dokumentimin ligjor të saj.