Tiranë, 25 qershor 2026 – Forcat Speciale RENEA dhe Forca e Ndërhyrjes së Shpejtë (FNSH) kanë marrë në ruajtje 24-orëshe Ilir Selmanin, një nga të pandehurit për vrasjen e ish-policit Santiago Malko, pas lirimit të tij nga paraburgimi me vendim të Gjykatës së Apelit të Posaçëm.

Sipas raportimeve, masa e shtuar e sigurisë është kërkuar nga Prokuroria e Posaçme (SPAK), për shkak të shqetësimeve mbi mundësinë e një arratisjeje. Aktualisht, Selmani ndodhet nën masën e sigurisë “arrest në shtëpi”, e vendosur pas konstatimit të përfundimit të afateve ligjore të paraburgimit gjatë procesit gjyqësor.

Vendimi për ndryshimin e masës së sigurisë u mor më 19 qershor 2026 nga Gjykata e Apelit të Posaçëm, e cila pranoi kërkesën e mbrojtjes dhe konstatoi humbjen e fuqisë së masës “arrest në burg” për shkak të tejkalimit të afateve të paraburgimit.

Selmani është dënuar në shkallë të parë me 26 vite burg për akuzën e vrasjes së kryer në kuadër të një grupi të strukturuar kriminal. Ai akuzohet si një nga autorët e vrasjes së Santiago Malkos, ngjarje e ndodhur në gusht të vitit 2019 në Tiranë.

Burime pranë procesit bëjnë të ditur se, nëse vendimi i shkallës së parë lihet në fuqi nga Apeli, Selmani do të rikthehet menjëherë në burg për të vijuar vuajtjen e dënimit.

Paralelisht, ndaj tij po zhvillohet edhe një procedim tjetër penal nga Prokuroria e Elbasanit për veprën penale të futjes së sendeve të palejuara në institucionet e vuajtjes së dënimit, pasi gjatë një kontrolli në burg atij iu gjet një aparat celular.

Çështja mbetet në shqyrtim në Gjykatën e Apelit të Posaçëm, e cila pritet të japë vendimin përfundimtar në vijim të procesit gjyqësor.