VENEZUELË – Dy tërmete të forta dhe të njëpasnjëshme kanë goditur Venezuelën, duke shkaktuar të paktën 32 viktima dhe rreth 700 të plagosur, sipas autoriteteve vendase. Bilanci pritet të ndryshojë ndërsa ekipet e emergjencës vijojnë operacionet e kërkim-shpëtimit në zonat më të prekura.

Sipas presidentes në detyrë, Delcy Rodríguez, lëkundja e parë sizmike kishte magnitudë 7.2, ndërsa më pak se një minutë më vonë vendi u godit nga një tërmet edhe më i fuqishëm me magnitudë 7.5.

Epiqendra e tërmetit të dytë u lokalizua rreth 23 kilometra në juglindje të Yumare, një zonë pranë bregdetit në perëndim të vendit, rreth 300 kilometra larg kryeqytetit, Caracas.

Tërmetet goditën në orën 18:04 sipas kohës lokale, në një moment kur në Venezuelë po zhvilloheshin festime kombëtare dhe një numër i madh qytetarësh ndodheshin në banesat e tyre. Lëkundjet u ndjenë në të gjithë territorin venezuelian, si dhe në zona të largëta të rajonit, përfshirë kryeqytetin e Kolumbisë, Bogotá.

Autoritetet kanë raportuar dëme të konsiderueshme në infrastrukturë dhe probleme serioze në rrjetet e komunikimit, veçanërisht në Caracas, Miranda dhe La Guaira. Shumë qytetarë kanë hasur vështirësi në kryerjen e telefonatave dhe përdorimin e internetit, duke e bërë të vështirë komunikimin me familjarët në zonat e prekura.

Ekspertët theksojnë se ndërprerje të tilla janë të zakonshme pas tërmeteve me intensitet të lartë, për shkak të mbingarkesës së rrjeteve dhe dëmtimeve të mundshme në infrastrukturën e telekomunikacionit. Deri më tani, kompanitë e telekomunikacionit nuk kanë dhënë një shpjegim zyrtar mbi shkakun e problemeve të raportuara.

Ekipet e emergjencës, ushtria dhe shërbimet e mbrojtjes civile janë angazhuar në terren për të vlerësuar dëmet dhe për të ndihmuar banorët e prekur nga katastrofa natyrore.

Autoritetet kanë paralajmëruar qytetarët të qëndrojnë vigjilentë për shkak të mundësisë së lëkundjeve pasuese, ndërsa operacionet e kërkim-shpëtimit vijojnë në disa rajone të vendit.

Lajmi mbetet në përditësim, ndërsa pritet një bilanc më i plotë i pasojave të kësaj fatkeqësie natyrore.