SHBA – Grupi C i Kupës së Botës 2026 ka mbyllur ndeshjet e fazës së grupeve, me Brazilin dhe Marokun që kanë siguruar zyrtarisht kualifikimin për në raundin e 1/16-ave. Ndërkohë, Skocia mban gjallë shpresat për të avancuar si një nga ekipet më të mira të vendeve të treta, ndërsa Haiti i jep lamtumirën turneut.

Në sfidën e zhvilluar në Miami, Brazili tregoi superioritet të plotë ndaj Skocisë, duke triumfuar me rezultatin 3-0. Protagonist i takimit ishte Vinicius Junior, i cili realizoi dy gola. Sulmuesi brazilian zhbllokoi sfidën që në minutën e 7-të pas një gabimi në mbrojtjen skoceze dhe vulosi dopietën në kohën shtesë të pjesës së parë.

Në fraksionin e dytë, Matheus Cunha realizoi golin e tretë për ekipin e drejtuar nga Carlo Ancelotti, duke konfirmuar formën e tij të shkëlqyer në këtë Botëror. Momenti më emocionues i mbrëmjes ishte rikthimi në fushë i Neymarit, i cili u aktivizua në minutën e 76-të pas një mungese të gjatë për shkak të dëmtimit. Kapiteni brazilian u rikthye në kombëtare pas tre vitesh, duke mos i fshehur emocionet.

Në Atlanta, Maroku përmbysi një ndeshje spektakolare ndaj Haitit dhe fitoi 4-2. Haiti surprizoi fillimisht duke kaluar në avantazh pas një autogoli të portierit Bono në minutën e 10-të. Achraf Hakimi barazoi shifrat në minutën e 39-të, por vetëm katër minuta më vonë haitianët rikthyen epërsinë.

Megjithatë, marokenët reaguan menjëherë dhe barazuan në kohën shtesë të pjesës së parë me Saibarin. Në pjesën e dytë, Rahimi dhe Yassine kompletuam përmbysjen, duke i dhuruar Marokut fitoren dhe kualifikimin.

Renditja përfundimtare e Grupit C:

Brazili – 7 pikë Maroku – 7 pikë Skocia – 3 pikë Haiti – 0 pikë

Brazili dhe Maroku avancojnë direkt në fazën e 1/16-ave, ndërsa Skocia do të presë rezultatet e grupeve të tjera për të mësuar nëse do të sigurojë një vend mes ekipeve më të mira të vendeve të treta.

Kombëtaret e kualifikuara deri tani në 1/16-at: Meksika, SHBA, Gjermania, Argjentina, Franca, Norvegjia, Kolumbia, Zvicra, Kanadaja, Bosnje-Hercegovina, Brazili, Maroku dhe Afrika e Jugut.