Kreu i BDI-së, Ali Ahmeti, ka komentuar zhvillimet dhe protestat e fundit në Tiranë, duke paralajmëruar sipas tij pasoja negative për Shqipërinë në disa sektorë kyç, veçanërisht turizmin dhe investimet.

Gjatë fjalës së tij në Kuvendin e BDI-së, Ahmeti vlerësoi rolin e Shqipërisë në mbështetjen e Kosovës, por u shpreh se situata aktuale po ndikohet nga zhvillime dhe fushata të jashtme.

Ai përmendi Greqinë dhe Beogradin si burime të mundshme ndikimi në narrativën rreth protestave, duke sugjeruar se reagimet e para ndaj situatës kanë ardhur nga këto vende.

Sipas tij, protestat dhe pasiguria politike mund të dëmtojnë ekonominë shqiptare, sidomos industrinë e turizmit dhe të investimeve, të cilat i cilësoi si shtylla kryesore të ekonomisë.

Ahmeti theksoi se qëndrimi i tij nuk lidhet me mbrojtje të një individi apo qeverie, por me shqetësimin për stabilitetin e Shqipërisë dhe interesin kombëtar.

Ai paralajmëroi gjithashtu se çdo klimë pasigurie politike mund të ketë pasoja më të gjera për investitorët vendas dhe të huaj, duke ndikuar negativisht në zhvillimin ekonomik të vendit.