Presidenti i Republikës, Bajram Begaj, ka reaguar në lidhje me protestat që po zhvillohen prej javësh në Tiranë, në ditën e 25-të të tyre.

Gjatë një aktiviteti të organizuar me rastin e 100-vjetorit të Prefekturës së Tiranës, kreu i shtetit vlerësoi rëndësinë e institucionit dhe njëkohësisht u ndal te zhvillimet aktuale në vend.

Begaj theksoi se qytetarët kanë të drejtën kushtetuese për t’u shprehur dhe për të marrë pjesë në jetën publike, duke nënvizuar se kjo e drejtë duhet të ushtrohet në përputhje me Kushtetutën dhe ligjet në fuqi.

Ai shtoi se konsolidimi i demokracisë dhe zhvillimi i qëndrueshëm i vendit varen nga bashkëpunimi mes qytetarëve dhe institucioneve, si dhe nga respektimi i shtetit të së drejtës.

Presidenti u shpreh gjithashtu se mbetet i përkushtuar në mbrojtje të Kushtetutës, të drejtave dhe lirive themelore të qytetarëve, si dhe në nxitjen e dialogut dhe bashkëpunimit institucional, në funksion të interesit publik dhe perspektivës europiane të Shqipërisë.