Në Tiranë është zhvilluar këtë të mërkurë dita e 25-të radhazi e protestës qytetare.

Qytetarët janë grumbulluar fillimisht në sheshin “Skënderbej”, përpara se të marshonin drejt godinës së Kryeministrisë, ku vijuan tubimin në shenjë kundërshtimi ndaj qeverisë.

Kërkesa kryesore e protestuesve mbetet dorëheqja e kryeministrit Edi Rama, si dhe largimi i qeverisë aktuale.

Sipas organizatorëve, ndër kërkesat e paraqitura prej tyre përfshihen gjithashtu krijimi i një qeverie teknike tranzitore, jopartiake, me mandat 12-mujor, si dhe hapja e një procesi të ri politik që, sipas tyre, garanton zgjedhje të lira dhe të ndershme.

Tubimi ka vijuar në mënyrë paqësore, ndërsa pritet të shihet nëse protesta do të shoqërohet me zhvillime të mëtejshme gjatë orëve në vijim.