FIFA po shqyrton mundësinë e miratimit të një ndryshimi të rëndësishëm në rregulloren e penalltive në fazat me eliminim direkt të Kupës së Botës.

Sipas propozimit të ri, do të hiqet sistemi aktual i hedhjes së dyfishtë të monedhës, që përdoret për të përcaktuar si rendin e ekzekutimit të penalltive, ashtu edhe portën ku ato do të gjuhen.

Në rregullin e ri, fituesi i hedhjes së monedhës do të ketë vetëm një zgjedhje: ose të gjuajë i pari, ose të përzgjedhë portën në të cilën do të ekzekutohen penalltitë.

Ndryshimi synon të thjeshtojë procedurën dhe të reduktojë elementin e rastësisë në momentet vendimtare të ndeshjeve.

Diskutimet vijnë pas rasteve të fundit në kompeticione të mëdha, ku hedhja e monedhës ka ndikuar në mënyrë të drejtpërdrejtë në avantazhin e një prej skuadrave gjatë serisë së penalltive.