Një valë e fuqishme dhe e zgjatur të nxehti pritet të përfshijë pjesën më të madhe të Evropës, ndërsa meteorologët paralajmërojnë se një anticiklon i fortë bllokues do të dominojë kushtet atmosferike të paktën deri në fund të qershorit, me gjasa që efektet të shtrihen edhe në fillim të korrikut.

Sipas modeleve meteorologjike, mbi kontinent po formohet fenomeni i njohur si “kupola e nxehtësisë”, i cili sjell temperatura shumë të larta dhe presion atmosferik të qëndrueshëm për një periudhë të gjatë.

Në nivelin 500 mbar, parashikohen vlera të larta të lartësisë gjeopotenciale, një tregues i një episodi të pazakontë të të nxehtit për këtë periudhë të vitit.

Ky sistem bllokues funksionon si një “kapak” atmosferik, duke penguar depërtimin e masave ajrore të freskëta dhe reshjeve. Si pasojë, ajri i nxehtë grumbullohet pranë sipërfaqes, duke rritur temperaturat në mënyrë të vazhdueshme nga dita në ditë.

Meteorologët raportojnë anomali termike ekstreme, me temperatura që në disa rajone pritet të jenë deri në 15–20 gradë Celsius mbi mesataren klimatike të fundqershorit.

Vala e të nxehtit, pas prekjes së Francës, Spanjës dhe Portugalisë, pritet të shtrihet gjatë javës drejt Belgjikës, Holandës, Luksemburgut dhe Mbretërisë së Bashkuar.

Në fundjavë, temperaturat e larta parashikohet të përfshijnë Gjermaninë, Poloninë, vendet skandinave, rajonin alpin dhe më pas Ballkanin.

Ekspertët paralajmërojnë se, për shkak të mungesës së sistemeve atmosferike që sjellin freskim, kjo situatë mund të zgjasë përtej fundit të qershorit, duke e bërë fillimin e korrikut një nga periudhat më të nxehta të verës deri tani.